ଆଓରି-ନୂଆଦିଲ୍ଲୀ(୨୪/୦୭) : ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ନିଜ ମାଟିରେ ଆତଙ୍କବାଦୀ ସଂଗଠନଗୁଡ଼ିକର ଉପସ୍ଥିତି ରହିଥିବା ମାନିଛନ୍ତି। ଏହା ସହିତ ପୁଲୱାମା ଆକ୍ରମଣ ପଛରେ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦର ହାତ ଥିବା ଇମ୍ରାନ ସ୍ଵୀକାର କରିଛନ୍ତି। ସେ କହିଛନ୍ତି, ସ୍ଥାନୀୟ ଆତଙ୍କବାଦୀମାନେ ପୁଲୱାମା ଆକ୍ରମଣକୁ ଚୂଡ଼ାନ୍ତ ରୂପ ଦେଇଥିଲେ। ଜୈଶ ସଂଗଠନ କେବଳ ପାକିସ୍ତାନରେ ନାହିଁ, ବରଂ କାଶ୍ମୀରରେ ବି ରହି କାମ କରୁଛି ବୋଲି ଇମ୍ରାନ କହିଛନ୍ତି।
ତେବେ ଏହା ପୂର୍ବରୁ ଅନ୍ତର୍ଜାତୀୟ ମଞ୍ଚରେ ପାକିସ୍ତାନ ନିଜ ଦେଶରେ ଜୈଶ ଆତଙ୍କବାଦୀ ସଂଗଠନର ଉପସ୍ଥିତି ନ ଥିବା କହିଥିଲା। ଜାତିସଂଘ ସୁରକ୍ଷା ପରିଷଦରେ ଜୈଶ ମୁଖ୍ୟ ମାସୁଦ ଆଝାରକୁ ବିଶ୍ଵ ଆତଙ୍କବାଦୀ ଘୋଷଣା ପାଇଁ ଆଗତ ପ୍ରସ୍ତାବକୁ ବି ଚୀନ ବିରୋଧ କରିଥିଲା।
ଗତ ଫେବୃୟାରୀ ୧୪ରେ ଜାମ୍ମୁ-କାଶ୍ମୀରର ପୁଲୱାମାରେ ଆତଙ୍କବାଦୀ ଆକ୍ରମଣ ଯୋଗୁ ସିଆରପିଏଫର ୪୦ ଯବାନ ଶହୀଦ ହୋଇଥିଲେ। ଏହି ଘଟଣା ପଛରେ ଜୈଶ ଆତଙ୍କୀ ସଂଗଠନର ହାତ ଥିଲା। ଭାରତ ପକ୍ଷରୁ ପାକିସ୍ତାନକୁ ଏ ସମ୍ପର୍କିତ ପ୍ରମାଣ ଦିଆଯାଇଥିଲା। କେବଳ ଏତିକି ନୁହେଁ, ଯେଉଁ ଆତଙ୍କବାଦୀ ଶିବିରରୁ ଆକ୍ରମଣର ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଥିଲା, ସେଠାରେ ଅର୍ଥାତ୍ ବାଲାକୋଟରେ ଭାରତୀୟ ବାୟୁସେନା ବିମାନ ଆକ୍ରମଣ କରିଥିଲା ଏବଂ ସେସବୁ ଶିବିରଗୁଡ଼ିକୁ ନଷ୍ଟ କରିଦେଇଥିଲା।
କେବଳ ପୁଲୱାମାନ ନୁହେଁ, ୯/୧୧ ଆତଙ୍କବାଦୀ ଆକ୍ରମଣ ପ୍ରସଙ୍ଗରେ ବି ଇମ୍ରାନ ମନ୍ତବ୍ୟ ଦେଇଛନ୍ତି। ଏହି ଆକ୍ରମଣ ପଛରେ ପାକିସ୍ତାନର କୌଣସି ହାତ ନାହିଁ ବୋଲି ସେ ଏକ ସାକ୍ଷାତକାରରେ କହିଛନ୍ତି।
