ବିଜୟ ସଂକଳ୍ପ ସଭାରେ ଯୋଗ ଦେଇ ରାଜ୍ୟ ସରକାରଙ୍କ ଉପରେ ବର୍ଷିଲେ ଧର୍ମେନ୍ଦ୍ର ପ୍ରଧାନ

ଧର୍ମେନ୍ଦ୍ର ପ୍ରଧାନ ରାଜ୍ୟ ସରକାର, ବଦଳିବା ଦରକାର କହିବା ସହ ଓଡିଶାର ବିକାଶ ପାଇଁ ଦିଲ୍ଲୀ ଏବଂ ଭୁବନେଶ୍ୱରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଡବଲ ଇଞ୍ଜିନ ଲଗାଇବା ପାଇଁ ଉପସ୍ଥିତ ଜନସାଧାରଣଙ୍କୁ ଆହ୍ୱାନ କରିଥିଲେ । ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଗରିବ ଲୋକଙ୍କ ସ୍ୱାସ୍ଥ୍ୟ ସେବା ପାଇଁ ପ୍ରଧାନମନ୍ତ୍ରୀ ଆୟୁଷ୍ମାନ ଭାରତ ଯୋଜନା ଲାଗୁ କଲେ । କୃଷକଙ୍କୁ ଆର୍ଥିକ ସୁବିଧା ଦେବା ପାଇଁ ପ୍ରଧାନମନ୍ତ୍ରୀ କିଷାନ୍ ସମ୍ମାନ୍ ନିଧି ଯୋଜନା ଆରମ୍ଭ କଲେ । ଓଡିଶାର ଗରିବ ଘରର ଲୋକଙ୍କୁ ଶୌଚାଳୟ ବନାଇବା ପାଇଁ ପଇସା ଦେଲେ ମାତ୍ର ନରେନ୍ଦ୍ର ମୋଦିଙ୍କ ଲୋକପ୍ରିୟତା କାରଣରୁ ରାଜ୍ୟ ସରକାର ଓଡିଶାରେ ଏହି ଯୋଜନାମାନ ଲାଗୁ କଲେ ନାହିଁ । ସ୍ୱାମୀ ମରୁ ପଛେ ସଉତୁଣୀ ବିଧବା ହେଉ ନୀତି ରାଜ୍ୟ ସରକାର ଆପଣେଇଛନ୍ତି । କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଓଡିଆ ଲୋକଙ୍କ ମଧ୍ୟରେ ମାନ୍ୟବର ବ୍ୟବଧାନ ତିଆରି କରିପାରିବେ ନାହିଁ  ।

ଏହାସହ ରାଜ୍ୟ ସରକାର କାଳିଆ ଯୋଜନା ଆରମ୍ଭ କରିଛନ୍ତି । କିନ୍ତୁ କାଳିଆ ଯୋଜନାରେ ହିତାଧିକାରୀଙ୍କ ତାଲିକା ନାହିଁ ।  ଓଡିଶାରେ ଲକ୍ଷ କୋଟି ଟଙ୍କା ଋଣଭାର ହେଲାଣି । ନବୀନ ବାବୁ ଓଡିଆ ଲୋକଙ୍କୁ ଠକୁଛନ୍ତି । ପଇସାର ଅହଙ୍କାରରେ କିଛି ଦୁର୍ନୀତିଗ୍ରସ୍ତ ଲୋକ ଓଡିଆ ଲୋକଙ୍କ ଜନମତକୁ ବିଭ୍ରାଟ କରିବା ପାଇଁ ଲାଗିଛନ୍ତି  । ମାତ୍ର ସେମାନେ ସ୍ୱାଧୀନତା ସଂଗ୍ରାମୀ, ବୀର ମାନଙ୍କର ମାଟି ବୋଲି ଭଲିଯାଇଛନ୍ତି ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।

ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଜାତୀୟ ରାଜପଥ ୫୫ରୁ ଖୋର୍ଦ୍ଧା-ବଲାଙ୍ଗୀର ପର୍ଯ୍ୟନ୍ତ ରାସ୍ତା ହେବା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଗଲା ମାତ୍ର ରାଜ୍ୟ  ସରକାର ଏହାକୁ କରେଇ ଦେଉନାହାନ୍ତି । କେନ୍ଦ୍ର ସରକାରଙ୍କ ୧ ଲକ୍ଷ ୩୬ ହଜାର କୋଟି ଟଙ୍କାର କାମ ରାଜ୍ୟ ସରକାର କରେଇ ଦେଉନାହାନ୍ତି ବୋଲି ସେ ଅଭିଯୋଗ କରିଛନ୍ତି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଇସାକୁ ଓଡିଶାର ଗାଁ ଗଣ୍ଡାରେ ପହଁଚାଇବାକୁ ଦିଲ୍ଲୀ ଓ ଭୁବନେଶ୍ୱରରେ ମୋଦିଙ୍କ ସରକାରକୁ ଆଣିବାକୁ ପଡିବ । ମୋଦି ସରକାର ଯାହା କହେ ତାହା କରେ । ଅସମ୍ଭବକୁ ସମ୍ଭବ କରିଥିବା ନେତୃତ୍ୱର ନାଁ ହେଲା ନରେନ୍ଦ୍ର ମୋଦି । ଦେଶରେ ଘଡିସନ୍ଧି ମୁହୂର୍ତରେ ମୋଦିଙ୍କୁ ଆଉ ଥରେ ପ୍ରଧାନମନ୍ତ୍ରୀ କରାଇବା ଦରକାର ।  ଓଡିଶାର ବିକାଶ ପାଇଁ ଓଡିଶା ଏବଂ ଦିଲ୍ଲୀରେ  ଡବଲ ଇଞ୍ଜିନ ଲଗାଇବାର ଆବଶ୍ୟକତା ରହିଛି । ଫିର୍ ଏକ୍ ବାର୍ ମୋଦି ସରକାର ବୋଲି ଧର୍ମେନ୍ଦ୍ର ପ୍ରଧାନ ଆହ୍ୱାନ କରିଥିଲେ ।