ମୋଜାମ୍ବିକ୍ ଗସ୍ତରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ
1 min read
ଆଓରି-ନୂଆଦିଲ୍ଲୀ(୨୯/୦୭) : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ତାଙ୍କର ପ୍ରଥମ ବିଦେଶ ଗସ୍ତରେ ଯାଇ ମୋଜାମ୍ବିକ୍ର ରାଜଧାନୀ ମୋପୁଟୋରେ ପହଞ୍ଚିଛନ୍ତି। ତାଙ୍କର ଏହି ତିନିଦିନିଆ ଗସ୍ତ କାଳରେ ଦୁଇ ଦେଶ ମଧ୍ୟରେ ସାମରିକ ସହଯୋଗ କ୍ଷେତ୍ରରେ ତିନୋଟି ରାଜିନାମା ସ୍ୱାକ୍ଷରିତ ହେବ। ଏହି ଦକ୍ଷିଣ ଆଫ୍ରିକୀୟ ରାଷ୍ଟ୍ରରେ ପହଞ୍ଚିବା ପରେ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ମୋଜାମ୍ବିକ୍ ସହ ସମ୍ପର୍କ ନିବିଡ଼ କରିବାକୁ ଭାରତ ଆଗ୍ରହୀ। ପ୍ରତିରକ୍ଷା ମନ୍ତ୍ରୀ ଗତକାଲି ମୋଜାମ୍ବିକ୍ର ସାମରିକ ମୁଖ୍ୟାଳୟ ପରିଦର୍ଶନ କରିଥିଲେ। ତାଙ୍କର ଗସ୍ତ ଅବସରରେ ସେ ସେଠାକାର ରାଷ୍ଟ୍ରପତି, ପ୍ରତିରକ୍ଷା ମନ୍ତ୍ରୀ, ବୈଦେଶିକ ମନ୍ତ୍ରୀ ଓ ସ୍ୱରାଷ୍ଟ୍ର ମନ୍ତ୍ରୀଙ୍କ ସହ ଆଲୋଚନା କରିବେ।
ଭାରତ ଏବଂ ମୋଜାମ୍ବିକ ସାମରିକ ସହଯୋଗ ବୃଦ୍ଧି ଦିଗରେ କେତେକ ବୁଝାମଣା ପତ୍ର ସ୍ଵାକ୍ଷର କରିବେ। ଏହି ଅବସରରେ ପ୍ରତିରକ୍ଷା ମନ୍ତ୍ରୀ ମୋଜାମ୍ବିକକୁ ଦୁଇଟି ଇଣ୍ଟରସେପ୍ଟର ବୋଟ ଓ ୪୪ଟି ଏସୟୁଭି ହସ୍ତାନ୍ତର କରିବେ। ୨୦୧୬ ଜୁଲାଇରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମୋଜାମ୍ବିକ ଗସ୍ତ ପରେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କରେ ଉନ୍ନତି ଘଟିଛି।
