ଏକ ଲକ୍ଷ କୋଟି ଟଙ୍କା ଅତିକ୍ରମ କଲା ଜନଧନ ଯୋଜନା ଜମାରାଶି
1 min read
ଆଓରି-ନୂଆଦିଲ୍ଲୀ(୧୧/୦୭) : ପାଞ୍ଚ ବର୍ଷ ପୂର୍ବେ ମୋଦୀ ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା ଜନଧନ ଯୋଜନାରେ ଜମାରାଶି ଏକ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଅର୍ଥ ମନ୍ତ୍ରାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ ଦେଶରେ ଥିବା ୩୬ କୋଟି ୬ ଲକ୍ଷ ଜନଧନ ଜମା ଖାତାରେ ଜୁଲାଇ ୩ ସୁଦ୍ଧା ଜମା ରାଶି ୧ଲକ୍ଷ ୪୯୫ କୋଟି ଟଙ୍କାରେ ପହଞ୍ଚିଛି। ଜନଧନ ହିତାଧିକାରୀଙ୍କ ଜମା ଖାତାରେ ଜମା ରାଶି କ୍ରମାଗତ ବୃଦ୍ଧି ପାଉଥିବା ଜଣାପଡିଛି।
ପ୍ରଧାନମନ୍ତ୍ରୀ ଜନଧନ ଯୋଜନା ୨୦୧୪ ଅଗଷ୍ଟ ୨୮ରେ ଆରମ୍ଭ ହୋଇଥିଲା ଏବଂ ଏହାର ମୂଳ ଉଦ୍ଦେଶ୍ୟ ହେଲା ବ୍ୟାଙ୍କ ସୁବିଧାରୁ ବଞ୍ଚିତ ଥିବା ଲୋକଙ୍କୁ ଏହି ଅର୍ଥନୈତିକ ଅନ୍ତର୍ଭୁକ୍ତି ଦେବା। ଏଥିରେ ଖୋଲା ଯାଇଥିବା ଆକାଉଣ୍ଟ ସଞ୍ଚୟ ଖାତା ଭଳି କାର୍ଯ୍ୟ କରିଥାଏ ଓ ସେଥିରେ ରୁପେ ଡେବିଟ କାର୍ଡ ସହ ଓଭର ଡ୍ରାଫ୍ଟ ସୁବିଧା ମିଳିଥାଏ।
ଯୋଜନାର ସଫଳତାକୁ ଦୃଷ୍ଟିରେ ରଖି କେନ୍ଦ୍ର ସରକାର ୨୦୧୮ ଅଗଷ୍ଟ ୨୮ ପରେ ଖୋଲାଯାଇଥିବା ଜନଧନ ସଂଚୟ ହିତାଧିକାରୀଙ୍କୁ ଦୁର୍ଘଟଣା ବୀମା ରାଶି ଏକ ଲକ୍ଷରୁ ଦୁଇ ଲକ୍ଷକୁ ବୃଦ୍ଧି କରିଥିଲେ। ଓଭର ଡ୍ରାଫ୍ଟ ସୁବିଧା ମଧ୍ୟ ୧୦ ହଜାରରୁ ୨୦ ହଜାରକୁ ବୃଦ୍ଧି କରାଯାଇଛି।
